«Манчестер Юнайтед» клубининг собиқ ҳужумчиси Уэйн Руни Бруну Фернандеш клуб тарихидаги барча даврларнинг рамзий терма жамоасига кириши мумкинми, деган саволга жавоб берди.
«Менимча, йўқ. У ерда Кантона бўлган, кўплаб кучли ярим ҳимоячилар ўйнаган. Фернандеш фақатгина статистиканинг ўзи билан бу рамзий жамоадан жой олади деб ўйламайман», — деди Руни «The Overlap» кўрсатувида.
Бруну Фернандеш «Манчестер Юнайтед» сафида олти йилдан бери тўп суриб келмоқда. Шу вақт ичида португалиялик футболчи 319 та расмий учрашувда иштирок этиб, ўз ҳисобига 105 та гол ва 103 та голли узатмани ёздириб қўйишга муваффақ бўлди.
