УЕФА Чемпионлар лигаси ўйинларини телеканаллар иштирокисиз, тўғридан-тўғри томоша қилиш имконини берувчи шахсий онлайн-сервисини ишга туширмоқчи. Бу ҳақда The Guardian нашри хабар бермоқда.

Ҳозирча лойиҳа бошланғич босқичда турибди. Уни Европа клублар ўртасидаги турнирларининг тижорий ҳуқуқлари учун масъул бўлган UC3 компанияси бошқармоқда. Режага кўра, ушбу сервис Осиё мамлакатларида, катта эҳтимол билан, трансляция ҳуқуқлари ҳали тўлиқ тақсимланмаган Ҳиндистон ёки Индонезияда синовдан ўтказилади.

Ҳозирги вақтда эфирларга кириш пуллик, қисман пуллик ёки бепул бўлиши номаълум. Ушбу сервисни яратишдан кўзланган асосий ғоя — тўғридан-тўғри мухлислардан кўпроқ даромад олиш, ўйинлар намойишини яхшироқ назорат қилиш, шунингдек, ҳозирча даромад юқори бўлмаган бозорларни ривожлантиришдан иборат.

Стриминг сервиси 2027 йилдан бошлаб ишга туширилиши кутилмоқда.