«Манчестер Юнайтед» марказий ҳимоячиси Маттейс де Лигт жароҳати сабабли жорий мавсумнинг қолган қисмини ўтказиб юбориш хавфи остида қолди.

Нидерландиялик футболчи ўтган йилнинг охиридан бери майдонга тушмаяпти. Маълум бўлишича, 26 ёшли ўйинчининг бел соҳасидаги жароҳатидан тикланиш жараёнида мураккабликлар юзага келган, шу сабабли унинг сафга қайтиши бир неча бор ортга сурилди. «Қизил иблислар» устози Майкл Кэррик марказий ҳимоячининг ушбу мавсумда ўйнай олишига ишончи комил эмаслигини билдирди.

«Бу мавсумда Де Лигт майдонга тушадими ёки йўқми, буни аниқ айтиш қийин, чунки орадан анча вақт ўтди. Бу шундай жароҳатлар сирасига кирадики, унда ўзингни деярли соғлом ҳис қиласан, лекин кейинчалик муаммо ҳали ҳам сақланиб қолгани маълум бўлади. У тикланиш жараёнини ўтамоқда, аммо бу биз хоҳлаган даражада тез амалга ошмаяпти. Ҳозирча тафсилотларга тўхталмоқчи эмасман. Унга ёрдам бериш учун қўлимиздан келган барча ишни қиламиз», — дея таъкидлади мураббий матбуот анжуманида.