«Manchester Yunayted» markaziy himoyachisi Matteys de Ligt jarohati sababli joriy mavsumning qolgan qismini o‘tkazib yuborish xavfi ostida qoldi.

Niderlandiyalik futbolchi o‘tgan yilning oxiridan beri maydonga tushmayapti. Ma’lum bo‘lishicha, 26 yoshli o‘yinchining bel sohasidagi jarohatidan tiklanish jarayonida murakkabliklar yuzaga kelgan, shu sababli uning safga qaytishi bir necha bor ortga surildi. «Qizil iblislar» ustozi Maykl Kerrik markaziy himoyachining ushbu mavsumda o‘ynay olishiga ishonchi komil emasligini bildirdi.

«Bu mavsumda De Ligt maydonga tushadimi yoki yo‘qmi, buni aniq aytish qiyin, chunki oradan ancha vaqt o‘tdi. Bu shunday jarohatlar sirasiga kiradiki, unda o‘zingni deyarli sog‘lom his qilasan, lekin keyinchalik muammo hali ham saqlanib qolgani ma’lum bo‘ladi. U tiklanish jarayonini o‘tamoqda, ammo bu biz xohlagan darajada tez amalga oshmayapti. Hozircha tafsilotlarga to‘xtalmoqchi emasman. Unga yordam berish uchun qo‘limizdan kelgan barcha ishni qilamiz», — deya ta’kidladi murabbiy matbuot anjumanida.