«Манчестер Юнайтед» сардори Бруну Фернандеш жорий мавсумда Европанинг кучли бешлик чемпионатларидаги энг сермаҳсул ярим ҳимоячилар рейтингида пешқадамлик қилмоқда.

Португалиялик футболчи ушбу мавсумда барча турнирларда жами 28 та голда бевосита иштирок этди — унинг ҳисобида 11 та гол ва 17 та ассист мавжуд. The Touchline нашрининг маълумотларига кўра, Фернандеш шу пайтгача рейтингни бошқариб келаётган «Барселона» аъзоси Фермин Лопесга етиб олди. 22 ёшли испаниялик футболчи ҳам 12 бор рақиблар дарвозасини ишғол қилиб, 16 та голли узатмани амалга оширган.

Жума куни Бруну Фернандеш Премьер-лига доирасида «Борнмут»га қарши кечган сафар ўйинида (2:2) пенальтини аниқ ижро этди. Таъкидлаш жоизки, «қизил иблислар»нинг 31 ёшли хавбеги бу мавсумда аллақачон олти бор 11 метрлик нуқтадан унумли фойдаланди, Фермин эса барча голларини фақат ўйин вазиятидан киритган.