«Барселона» «Манчестер Юнайтед»га ҳужумчи Маркус Рэшфорднинг ижара муддатини узайтиришни таклиф қилди. Бу ҳақда Diario SPORT нашри хабар бермоқда.

Манба берган маълумотларга кўра, каталонияликлар Рэшфордни яна бир мавсумга ижарага олиб, кейинчалик — 2027 йилда сотиб олмоқчи бўлган. Бироқ «қизил иблислар» бу таклифга рад жавобини бергани айтилмоқда. Англия гранди «Барселона» билан бу борада музокара ўтказиш нияти йўқлигини ва агар «кўк-анорранглилар» Рэшфордни ўз сафида кўришни истаса, ижара шартномасида кўрсатилганидек, келаётган ёзда 30 миллион евро эвазига уни сотиб олишлари кераклигини аниқ тушунтириб қўйган.

28 ёшли Рэшфорд «Барселона» таркибида барча турнирларда 38 та ўйинда иштирок этди, 10 та гол урди ва 13 та голли узатмани ўз ҳисобига ёздириб қўйди.