«Барселона» бош мураббийи Ханс-Дитер Флик матбуот анжуманида ҳужумчи Маркус Рэшфорднинг ҳолати ҳақида гапириб ўтди.

— Нима учун Маркус Рэшфорд камроқ ўйин амалиётига эга бўла бошлади?

— Охирги кунларда Маркусда кичик муаммолар бор эди, шу сабабли биз уни асрадик. Ҳозир у яна 100 фоиз тайёр ҳолатда.

Маълумки, Рэшфорд ўтган ёзда «Манчестер Юнайтед»дан ижара асосида «Барселона»га ўтган эди. Ўшандан бери ҳужумчи 38 та расмий учрашувда майдонга тушиб, 10 та гол урди ва жамоадошларига 13 та голли узатмани амалга оширди.

Якшанба куни «Барселона»ни Испания Ла Лигаси доирасида ўз майдонида «Райо Вальекано»га қарши ўйин кутмоқда.