Лондоннинг «Челси» клуби Тодд Боули келганидан бери ўтган тўрт мавсум давомида АПЛда ҳали бирор марта 70 очколик довондан ўта олмади. Жорий мавсумда ҳам Лондон жамоаси ушбу кўрсаткичга эриша олмайди.
Клубнинг аввалги хўжайини Роман Абрамович даврида бундай узоқ давом этган сериялар кузатилмаган эди. Кетма-кет икки мавсум давомида 70 очкодан кам жамғарилган ҳолат фақат бир марта — 2019/20 ва 2020/21 йилги мавсумларда қайд этилган.
Абрамовичнинг «Челси»даги 19 йиллик фаолияти давомида клуб фақат тўрт марта мавсумни 70 очкодан кам жамғарган ҳолда якунлаган.
«Челси»да охирги марта кетма-кет тўрт мавсум давомида 70 очкодан паст кўрсаткич қайд этилиши Абрамович келишидан олдин — 1999–2003 йилларда кузатилган эди.
