Таниқли британ журналисти Пирс Морган Лондоннинг «Арсенал» клуби яқин кунларда бўлиб ўтган Англия лига кубоги финалида «Манчестер Сити»дан 0:2 ҳисобида мағлубиятга учраганига изоҳ берди.

"Квинтупл" (бир мавсумда 5 та соврин ютиш) ҳақидаги орзуларим, афсуски, чиппага чиқди. Энди биз фақат „квадрупл“ қайд этишимиз мумкин — Чемпионлар лигаси, Премьер-лига ва Англия кубогида ғалаба қозониш, шунингдек, «Тоттенхэм»нинг АПЛдан тушиб кетиши", — дея Морганнинг сўзларидан иқтибос келтиради talkSPORT.

Айни дамда Микель Артета шогирдлари Англия чемпионати турнир жадвалида «шаҳарликлар»ни 9 очкога ортда қолдирган ҳолда биринчи ўринни эгаллаб турибди.

Чемпионлар лигасида эса «канонирлар»ни чорак финал доирасида Лиссабоннинг «Спортинг» жамоасига қарши икки ўйиндан иборат тўқнашув кутмоқда. Шунингдек, «Арсенал» Англия кубоги учун курашни ҳам давом эттирмоқда — лондонликлар 4 апрель куни 1/4 финалда «Саутгемптон»га қарши майдонга тушишади.