“Манчестер Юнайтед”нинг собиқ ҳужумчиси Майкл Оуэн бош мураббий Майкл Керрик қўл остида жамоа чемпионлик даражасидаги ўйин кўрсатаётганини таъкидлади. Бу ҳақда у Daily Mail нашрига берган интервьюсида маълум қилди.

“Агар чемпионат айнан Керрик жамоани қабул қилиб олган пайтда старт олганида, "Манчестер Юнайтед" ҳозир турнир жадвалида пешқадамлик қилаётган бўларди. Айни дамда мавсумнинг учдан бир қисми ортда қолган ва ‘қизил иблислар’ ишончли тарзда биринчи ўринда бораётган бўларди. Биз эса: ‘Улар АПЛ чемпиони бўла оладими?’ деган саволни ўртага ташлаётган бўлардик”, дейди Оуэн.

Маълумот учун, Майкл Керрик бош мураббий этиб тайинланганидан буён жамоа 10 та учрашув ўтказди. Ушбу баҳсларнинг 7 тасида ғалаба қозонилди, 2 марта дуранг қайд этилди ва фақат бир бор мағлубиятга учралди. Шуни ҳам қайд этиш керакки, сўнгги учта ўйиннинг иккитасида манчестерликлар очко йўқотишди.

Англия Премьер Лигасининг 31-туридан сўнг “Манчестер Юнайтед” 55 очко билан мусобақа жадвалининг учинчи поғонасида бормоқда. Турнирда эса 70 очко жамғарган “Арсенал” яққол пешқадамлик қилмоқда.