«Комо» ярим ҳимоячиси Николас Пас Аргентина терма жамоасидаги дебют голини урди. 21 ёшли футболчи Мавритания терма жамоасига қарши кечган ўртоқлик учрашувининг 32-дақиқасида рақиб дарвозасини ишғол қилиб, ҳисобни 2:0 кўринишига келтирди.
Амалдаги жаҳон чемпионлари баҳсда 2:1 ҳисобида ғалабага эришишди, бироқ Пас учун бу кун узоқ вақт хотирада қоладиган бўлди — у «альбиселесте» сафидаги еттинчи ўйинида илк голини киритди. Танаффусда Лионель Скалони ёш юлдузни Лионель Мессига алмаштирди.
Келаётган ёзда Николас Пас ўзи учун қадрдон бўлган Мадриднинг «Реал» клубига қайтиши мумкин: эслатиб ўтамиз, «қаймоқранглилар» ўз тарбияланувчисини атиги 8 миллион евро эвазига қайта сотиб олиш ҳуқуқига эга, ваҳоланки унинг бозор қиймати Transfermarkt баҳосига кўра 65 миллион еврони ташкил этади.
