Англия терма жамоаси бош мураббийи Томас Тухель Уругвай билан кечган ўртоқлик учрашуви (1:1) якунларини сарҳисоб қилар экан, ярим ҳимоячи Фил Фоденнинг иштирокига тўхталиб ўтди. Фоден асосий таркибда майдонга тушиб, 56 дақиқа ҳаракат қилди.

«Биз рақибнинг ярим ҳимоя учлиги тез-тез позициясини ўзгартиришини, эркин ҳаракат қилишини ва сизни ўз жойингиздан чиқариб юборишга ҳаракат қилишини билардик. Бизга жуда ишончли ва ақлли тактик ўйин керак эди», — дея мураббийнинг сўзларини келтирмоқда The Times.

«Айнан шу вазиятда Фил ўйинга қўшилди. У машғулотларда ҳимояланиш схемаларини ишлаб чиқишда ажойиб иштирок этди, қолаверса, «Манчестер Сити»да кўп бор "саккизлик" позициясида ўйнаган. Баъзи вазиятларда менга у бироз жасоратлироқ ҳаракат қилиши, "ўнлик" сифатида таваккал қилиб, нимадир яратишга уриниши мумкин бўлиб туюлди».

Сешанба куни, 31 мартда Англия терма жамоаси Жаҳон чемпионатига тайёргарлик доирасида Япония билан ўртоқлик учрашуви ўтказади.