«Лейпциг» жамоаси вингер Ян Диомандени яна бир мавсумга олиб қолишга ҳаракат қилмоқда. Шу билан бирга, клуб 19 ёшли иқтидор учун тушадиган йирик таклифларни кўриб чиқишга ҳам тайёр. Бу ҳақда Sky Sport Germany журналисти Филипп Хайнц Х (Twitter) ижтимоий тармоғидаги саҳифасида хабар берди.

Манбанинг маълумотига кўра, «буқалар» Диомандени 100 миллион еврога баҳоламоқда ва бу нархни пасайтириш ниятида эмас. Германия жамоаси бундай юқори нарх ҳужумчига қизиқиш билдираётган бошқа клубларни фикридан қайтаришига умид қилмоқда.

Аввалроқ ОАВда ивуарлик футболчига «Ливерпуль» ва «Манчестер Юнайтед» томонидан жиддий қизиқиш борлиги ҳақида хабарлар тарқалган эди.

Жорий мавсумда Диоманде барча турнирларда 29 та ўйинда иштирок этиб, 11 та гол ва 8 та голли узатмани амалга оширди. Футболчининг клуб билан амалдаги шартномаси 2030 йилнинг ёзига қадар мўлжалланган. Transfermarkt портали маълумотларига кўра, унинг бозор қиймати 75 миллион еврони ташкил этади.