Англиялик собиқ футболчи Дэвид Бекхэм Мадриднинг «Реал» клуби ярим ҳимоячиси Жуд Беллингем ҳақида ўз фикри билан ўртоқлашди.

22 ёшли футболчи яқинда жароҳатидан қутулди, у февраль ойи бошидан бери майдонга тушмаётган эди.

«Беллингем фаолиятининг бошида «Бирмингем» ва «Боруссия»да ўзини жуда яхши кўрсатди, аммо «Реал»га ўтиш ҳамма нарсани ўзгартиради — бу жуда жиддий қадам эди. Унинг Мадриддаги илк мавсуми ақл бовар қилмас даражада бўлди. Мухлислар уни меҳнатсеварлиги ва ажойиб фазилатлари учун яхши кўришади. У бошқаларнинг қўлидан келмайдиган ишларни қила олади ва унинг маҳорати Англия терма жамоасига жуда асқотади», — дея Бекхэмнинг сўзларини келтиради talkSPORT.

Жуд Беллингем 2023 йилнинг ёзида Дортмунднинг «Боруссия» клубидан «қироллик клуби» сафига кўчиб ўтган эди.