Англия терма жамоаси бош мураббийи Томас Тухель Букайо Сака ва Деклан Райснинг жароҳатлари ҳақида тўхталиб ўтди. Аввалроқ, ушбу футболчилар соғлиғидаги муаммолар сабабли «уч шерлар» қароргоҳини тарк этгани хабар қилинган эди.
«Сака ва Райс? Улар майдонга тушишни, жамоага ёрдам беришни жуда ҳам хоҳлашганди, бироқ таваккал қилишдан ҳеч қандай маъно йўқ эди. Уларнинг ўзларини ноқулай ҳис қилаётгани кўриниб турганди. Вазиятни янада оғирлаштириб юбориш хавфи мавжуд эди», — деди Тухель журналистларга берган интервьюсида.
Сешанба куни, 31 март куни Англия терма жамоаси ўз майдонида Японияга қарши ўртоқлик учрашувини ўтказади. Бундан аввал «уч шерлар» Уругвай билан дуранг (1:1) ўйнаган эди.
