«Ливерпуль» клуби ва Нидерландия терма жамоаси ўнг қанот ҳимоячиси Жереми Фримпонг навбатдаги жароҳатини олди.
25 ёшли футболчи Колумбияга қарши кечган ўртоқлик учрашувининг иккинчи бўлими аввалида захирадан майдонга тушди, бироқ 58-дақиқадаёқ мажбурий равишда алмаштирилди. Ўйин якунланганидан сўнг «тўқ сариқлар» устози Рональд Куман латералнинг жароҳат олганини тасдиқлади.
Эндиликда «Ливерпуль»ни олдинда жуда муҳим баҳслар кутмоқда: шу шанба, 4 апрель куни Англия Кубоги 1/4 финали доирасида «Манчестер Сити»га қарши ўйин бўлиб ўтса, 8 апрель куни Арне Слот шогирдлари Чемпионлар лигаси чорак финалининг илк учрашувида «ПСЖ» билан тўқнаш келишади.
Эслатиб ўтамиз, Нидерландия ва Колумбия терма жамоалари ўртасидаги баҳс 1:1 ҳисобидаги дуранг билан якунланди.
