"Барселона" ҳали ҳам "Манчестер Юнайтед" ҳужумчиси Маркус Рэшфорднинг трансфер ҳуқуқини 30 миллион евро эвазига сотиб олиш имкониятига эга. Бу ҳақда журналист ва инсайдер Решад Раҳман хабар бермоқда.
Манбанинг маълумотига кўра, каталонияликлар июнь ойига қадар футболчини белгиланган нархда сотиб олиш ва тўловни учга бўлиб-бўлиб тўлаш имкониятига эга бўладилар. Агар келишув амалга ошса, манкунианликлар футболчи учун 2026 йилдан 2028 йилгача ҳар йили 10 миллион евродан олиб турадилар.
Жорий мавсумда Рэшфорд барча мусобақаларда 39 та ўйинда иштирок этиб, 10 та гол урди ва 13 та голли узатмани амалга оширди. Transfermarkt портали маълумотларига кўра, футболчининг бозор қиймати ҳозирда 40 миллион еврони ташкил этади.
