Халқаро футбол федерациялари ассоциацияси (FIFA) президенти Жанни Инфантино Эрон миллий терма жамоаси футболчилари ҳамда Эрон футбол федерацияси вице-президенти Меҳди Муҳаммад Наби билан учрашди. Бу ҳақда Инфантино ўзининг Instagram саҳифасида маълум қилди.

“Коста-Рика жамоасига қарши ўртоқлик учрашуви олдидан Эрон миллий терма жамоаси ўйинчилари билан учрашганимдан жуда мамнунман. Мен футболчилар, шунингдек, Эрон футбол федерациясининг биринчи вице-президенти Меҳди Муҳаммад Наби билан мулоқот қилиш имкониятига эга бўлдим. Эрон терма жамоасини Жаҳон чемпионатига чиққани ҳамда Эрондаги ва бутун дунёдаги миллионлаб инсонларни ғурурлантиргани билан яна бир бор табрикладим. Мамлакат шарафини ҳимоя қилиш бу улкан масъулият, шу боис мен ўйинчиларни ўз мухлисларини руҳлантиришда давом этишга ва жаҳон аренасида ўз халқини орзуларини рўёбга чиқаришга чақирдим”, деб ёзди Инфантино.

Ташкилот раҳбари FIFA мундиалга муносиб тайёргарлик кўриши учун Эрон терма жамоасини қўллаб-қувватлашини таъкидлади:

“Футбол ҳатто энг мураккаб шароитларда ҳам бирлик ва умид олиб келади. FIFA жамоанинг Жаҳон чемпионатига энг яхши ҳолатда тайёргарлик кўришини таъминлаш учун уларни қўллаб-қувватлашда давом этади. Мен улар бутун дунёга инсонпарварлик ва бирдамлик хабарини етказишларини интиқлик билан кутаман”.

Аввалроқ Инфантино мураккаб геосиёсий вазиятда унга таъсир ўтказиш имконсиз эканини айтиб ўтган эди.

Маълумот учун, Эрон терма жамоаси гуруҳ босқичидаги барча учта ўйинни АҚШда ўтказиши белгиланган. Эрон жамоаси Бельгия, Миср ва Янги Зеландия терма жамоалари билан бир гуруҳдан жой олган. Турнир 11 июндан 19 июлга қадар бўлиб ўтади, ўйинлар АҚШ, Мексика ва Канадада ўтказилади. Мусобақада илк бор 48 та жамоа иштирок этади.