Лондоннинг “Арсенал” клуби Хвича Кварацхелия трансфери бўйича “Пари Сен-Жермен” билан келишувга эришди. Бу ҳақда “тўпчилар”га оид инсайд маълумотларини сиздириб борувчи Арсенал News нашри хабар берди.
Қайд этилишича, Грузия терма жамоаси аъзоси шахсий шартнома шартлари келишилганидан ва тиббий кўрикдан ўтганидан сўнг 2026 йил ёзида клуб сафига қўшилади.
Маълумот учун, Хвича Кварацхелия 2025 йилнинг январь ойида Париж клубига келиб қўшилган эди. Унинг клуб билан амалдаги шартномаси 2029 йилнинг ёзига қадар мўлжалланган.
Якунланаётган мавсумда футболчи барча турнирлар доирасида жами 37 та ўйинда майдонга тушиб, ўз ҳисобига 12 та гол ва 7 та голли узатмани ёздириб қўйди. Transfermarkt портали ҳужумчининг айни пайтдаги бозор қийматини 90 миллион еврога баҳоламоқда.
“Кварадона” 25 ёшда. У “Наполи”даги ёрқин ўйинлари сабаб мухлислар уни клуб афсонаси Диэго Марадонага қиёслаб, шундай ном билан аташган. Хвича Неапол клуби сафида Италия А Серияси ғолиблигини қўлга киритган.
У “ПСЖ” таркибида УЕФА Чемпионлар Лигаси, FIFA Қитъалараро Кубоги, УЕФА Суперкубоги, Франция чемпионати, Кубоги ва Суперкубогида зафар қучган.













