Сешанба куни эрталаб Италия молия полицияси «Сан-Сиро» стадионини «Интер» ва «Милан» клубларига 200 миллион еврога сотиш бўйича келишувни тергов қилиш доирасида Милан шаҳар кенгаши офисларида тинтув ўтказди.
Мансабдор шахслар тил бириктириш ва кимошди савдоларида фирибгарлик қилишда гумонланмоқда. Мусодара қилинган буюмлар орасида компьютерлар ва мобил телефонлар бор.
Шунингдек, тўққиз кишига нисбатан тергов ҳаракатлари олиб борилмоқда, улар орасида «Интер»нинг собиқ бош директори Алессандро Антонелли ва «Милан» томонидан бошқариладиган Sport Life City компанияси президенти Жузеппе Бономи ҳам бор.
Тахминларга кўра, улар махфий маълумотларни улашиб келган ва парда ортида иш олиб бориб, «Интер» ва «Милан» билан келишув тузилишига ёрдам берган — бу билан улар ноҳалол рақобатни юзага келтиришган.
«Милан» ва «Интер» клубларининг ўзлари тергов остида эмас, бироқ тинтувлар стадионни бошқариш учун ташкил этилган ва ҳар икки клубга тегишли бўлган M-I компаниясида ҳам ўтказилган.
