Германия Бундеслигасида март ойининг энг яхши футболчиси танланди — ушбу номга «Штутгарт» марказий ҳужумчиси Дениз Ундав лойиқ кўрилди. Тегишли маълумот Германия чемпионатининг расмий сайтида эълон қилинди.
29 ёшли форвард овоз бериш жараёнида беш нафар номзодни ортда қолдирди. Улар: Ян Диоманде («РБ Лейпциг»), Пауль Небель («Майнц»), Хеннес Беренс («Хайденхайм»), Игор Матанович («Фрайбург») ва Константинос Кульеракис («Вольфсбург»).
Ўтган ойда Дениз Ундав Бундеслига доирасида тўртта учрашувда иштирок этиб, ўз ҳисобига бешта гол ёздириб қўйишга муваффақ бўлди.
Германия чемпионатининг 27 туридан сўнг «Штутгарт» 53 очко жамғарган ҳолда турнир жадвалида учинчи ўринда бормоқда.
