«Манчестер Сити» бош мураббийи Хосеп Гвардиола Англия Кубоги доирасидаги «Ливерпуль»га қарши ўйин олдидан журналистлар билан суҳбатлашди. Гвардиоладан ҳужумкор ярим ҳимоячи Фил Фоденнинг ўйинидаги пасайиш уни хавотирга солаётгани ҳақида сўрашди.
«Фоден борасида хавотир? Асло. Заррача ҳам йўқ. У 25 ёшда, олти марта Премьер-лига чемпиони бўлган ва яна кўплаб совринларни қўлга киритган. Унинг жамоа муваффақиятларига қўшган ҳиссаси беқиёс. Ҳозир юз бераётган ҳолат — жуда ҳам узоқ давом этадиган фаолиятдаги табиий жараён. Бу нормал вазият. Қайсидир паллада у яна "ўзига келади" ва аввалги даражасига қайтади», — деди Гвардиола.
«Манчестер Сити» ўз майдонида Англия Кубоги доирасида «Ливерпуль»ни қабул қилишга тайёргарлик кўрмоқда. Учрашув 4 апрель куни Тошкент вақти билан соат 16:45 да бошланади.
