«Манчестер Юнайтед» ярим ҳимоячиси Мануэль Угарте келаётган ёзда клубни тарк этиши мумкин.
Аввалроқ «қизил иблислар» уругвайлик футболчини «Ньюкасл» ва «Астон Вилла»га ижарага беришдан бош тортган эди, бироқ сўнгги вақтларда вазият ўзгарди — эндиликда клуб хавбекни қўйиб юборишга тайёр. Бу ҳақда El Pais нашрига таяниб Transfer News Live хабар бермоқда. Манкунианликлар раҳбарияти яқинлашиб келаётган мавсумлар оралиғида 24 ёшли футболчи бўйича тушадиган таклифларни кўриб чиқишга тайёр.
Мануэль Угарте жорий мавсумда етарлича ўйин амалиётига эга бўлмаяпти — у барча турнирларда майдонда жами 900 дақиқадан сал кўпроқ вақт ўтказди. Футболчининг «Манчестер Юнайтед» билан шартномаси 2029 йил ўрталаригача мўлжалланган, Transfermarkt портали эса унинг бозор қийматини 30 миллион еврога баҳоламоқда.
