Мадриднинг «Атлетико» клуби президенти Энрике Сересо жамоа нима сабабдан «Барселона» ҳужумчиси Ферран Торресни ўз сафига қўшиб олмоқчи эканлигини очиқлади.
«Аслида ҳаммаси жуда оддий. Тарих шуни кўрсатмоқдаки, ҳар сафар «Барселона»дан ҳужумчи сотиб олганимизда, биз Испания чемпионатида ғолиб чиққанмиз. Айнан шу сабабли Ферран Торресни қўлга киритмоқчимиз — биз ушбу ғалабали анъанани сақлаб қолишга интиляпмиз», — деди Сересо.
Жорий мавсумда Ферран Торрес «Барселона» сафида 40 та ўйинда майдонга тушиб, 16 та гол урди ва 1 та голли узатмани амалга оширди. Унинг каталонияликлар билан шартномаси 2027 йил ёзигача мўлжалланган.
