«Пари Сен-Жермен» ярим ҳимоячиси Витинья клубни тарк этиши мумкинлиги ҳақидаги миш-мишларга изоҳ берди. Аввалроқ футболчига Мадриднинг «Реал» клуби ва Саудия Арабистонининг бир қатор клублари қизиқиш билдираётгани ҳақида хабар берилган эди.
«Кетиш аҳмоқлик бўларди. Ҳозир бу мен учун энг яхши қарор деб ўйламайман. Бу ерда, ПСЖда ўзимни аъло даражада ҳис қиляпман. Менимча, бу ердаги одамлар мени чиндан ҳам яхши кўришади, деб ўйлайман, мен бу меҳрни қозонишга муваффақ бўлдим. Бу ер менга ёқади, оиламга ҳам. Бизда фантастик жамоа ва ақл бовар қилмайдиган мураббий бор.
Саудия клубларининг қизиқишига келсак, мен бу ерда, Европада, катта клубда шундоқ ҳам ёмон ишлаб топмаяпман. Маошимнинг икки ёки уч баробар ошиши мени заррача ҳам бахтли қилмаган бўларди», — дея Витиньянинг сўзларидан иқтибос келтиради RMC Sport.
Жорий мавсумда Витинья барча мусобақаларда 42 та ўйинда иштирок этиб, 7 та гол урди ва 10 та голли узатмани амалга оширди. Чоршанба, 8 апрель куни Париждаги «Парк де Пренс» стадионида ПСЖ ва «Ливерпуль» ўртасида Чемпионлар Лигаси 1/4 финалининг дастлабки ўйини бўлиб ўтади. Жамоалар ўртасидаги иккинчи ўйин 14 апрелга белгиланган.
