«Ливерпуль» хўжайинлари бош мураббийни алмаштириш борасида кескин чоралар кўришни истамаяпти ва Арне Слотга яна бир имконият бериш тарафдори.
Мутахассиснинг клуб билан шартномаси 2026/2027 йилги мавсум якунигача (2027 йил 30 июнь) мўлжалланган, шу сабабли келаси мавсум унинг тақдири учун ҳал қилувчи аҳамиятга эга бўлади, деб хабар бермоқда The Telegraph.
Fenway Sports Group жамоанинг жорий мавсумдаги муваффақиятсизликларига Слотга боғлиқ бўлмаган бир қанча омиллар йиғиндиси сабаб бўлган деб ҳисоблайди: Диогу Жотанинг вафоти, Муҳаммад Салоҳнинг ўйинидаги пасайиш ва мослашиш учун вақт талаб этадиган кўплаб янги футболчиларнинг келиб қўшилгани.
31-турдан сўнг «Ливерпуль» 49 очко билан АПЛ турнир жадвалида бешинчи ўринни эгаллаб турибди. Чемпионлар лигаси чорак финалининг дастлабки баҳсида жамоа сафарда «ПСЖ»га имкониятни бой берди (0:2), аввалроқ эса Англия Кубогида «Манчестер Сити»дан йирик ҳисобда мағлубиятга учраган эди (0:4).
