«Барселона» ҳужумчиси Роберт Левандовски Польша терма жамоаси бош мураббийи ёрдамчиси Яцек Магеранинг вафоти муносабати билан ҳамдардлик билдирди.
«Мураббий, ҳаммаси бундай бўлиши керак эмас эди... Оила аъзолари ва яқинларига ҳамдардлик билдираман», – деб ёзди Левандовски ўзининг ижтимоий тармоқдаги саҳифасида.
Бугун, 10 апрель куни мутахассис Вроцлав шаҳридаги парклардан бирида югуриш вақтида ўзини ёмон ҳис қилган. У ҳушини йўқотган ва шифохонага етказилган. Реанимация ишлари қарийб бир соат давом этган, бироқ «Легия»нинг собиқ ҳимоячисини қутқариб қолишнинг имкони бўлмаган.
Магера 2025 йилнинг ёзидан буён Польша терма жамоасида Ян Урбаннинг ассистенти сифатида ишлаб келаётган эди. Аввалроқ Польша терма жамоаси саралаш турнири финалида Швецияга (2:3) имкониятни бой бериб, АҚШ, Канада ва Мексика мезбонлик қиладиган ЖЧ-2026 йўлланмасини қўлга кирита олмаган эди.
