Ўзбекистон миллий терма жамоасининг собиқ мураббийи Алеш Чех Словениянинг Delo нашрига берган интервьюсида Катанец давридаги муваффақият сирлари ва дастлаб юзага келган қийинчиликлар ҳақида сўзлаб берди.

“Ҳужумчилар ҳимояга қайтишни истамасди”

Чехнинг таъкидлашича, мураббийлар штаби иш бошлаган вақтда мамлакатда терма жамоанинг келажагига нисбатан катта шубҳа бор эди. Футболчилар эса янги талабларга кўникиши осон кечмаган:

“Одамлар бу жамоанинг яна нимадир юта олишига ишонмай қўйишганди. Сречко йигитларни майдонда борини беришга ўргатди. Аввалига футболчилар талабларимизни тушунишмади: "Мураббий, биз ҳужумчимиз-ку, нега ҳимояга қайтишимиз керак?", дейишарди. Кейинчалик улар Сречконинг самимий эканини ва фақат катта турнирга чиқишни исташини англаб етишгач, ҳамма нарса осонлашди”, — дейди мураббий.

Асосий қаҳрамон — Катанец
Алеш Чех Ўзбекистоннинг Жаҳон чемпионатига йўлланма олишида айнан Сречко Катанецнинг ҳиссаси беқиёс эканини алоҳида қайд этди:

“Ўзбекистон билан эришилган муваффақиятдан жуда хурсандман. Айниқса, Сречко учун фахрланаман, чунки бу биринчи навбатда унинг ғалабаси. У мўъжиза яратди: аввал футболчиларни, кейин эса бутун халқни ўзига ишонтира олди. Таъкидлашим керак, бу натижага ҳамма кишидан кўра кўпроқ Катанец лойиқ эди”.

Эслатиб ўтамиз, Алеш Чех Катанец кетганидан кейин ҳам бир муддат Тошкентда ишлашда давом этди. Бироқ миллий терма жамоага Фабио Каннаваро бош мураббий этиб тайинлангач, Чех ўз лавозимини тарк этишга қарор қилди.