"Жирона" бош мураббийи Мичел Испания чемпионатининг 31-тури доирасида Мадриднинг "Реал" жамоаси билан бўлиб ўтган учрашув якунлари ҳақида фикр билдирди. 10 апрель куни ўтказилган баҳс 1:1 ҳисобидаги дуранг билан якунланди.
"Биз кўп қийинчиликларга дуч келдик, аммо бу ерда бошқача бўлишини кутмаган ҳам эдик. "Реал" кучлироқ эди ва кўпроқ вазиятлар яратди. Биз ҳақиқий руҳий барқарорлик, ақл бовар қилмас ирода ва жанговар руҳни намойиш этдик", — дея Мичелнинг сўзларини келтиради Mundo Deportivo нашри.
"Вақтимизнинг катта қисмини ҳимояланиш билан ўтказдик ва бу жуда қийин бўлди. Одатий ўйин услубимизни инобатга олсак, бу осон кечгани йўқ — биз ўзимизга хос тарзда ҳаракат қила олмадик. Диққат-эътибор борасидаги жиддий синовдан ўтиб, узоқ вақт давомида бардош бердик", — дея қўшимча қилди "Жирона" устози.
Ушбу дуранг натижадан сўнг "Жирона" 38 очко билан турнир жадвалида 12-ўринни эгаллаб турибди. Яна учта клуб ҳисобида ҳам шунча очко мавжуд ва улар ўз ўйинларини бир оз кечроқ ўтказишади.
