"Jirona" bosh murabbiyi Michel Ispaniya chempionatining 31-turi doirasida Madridning "Real" jamoasi bilan bo‘lib o‘tgan uchrashuv yakunlari haqida fikr bildirdi. 10 aprel kuni o‘tkazilgan bahs 1:1 hisobidagi durang bilan yakunlandi.

"Biz ko‘p qiyinchiliklarga duch keldik, ammo bu yerda boshqacha bo‘lishini kutmagan ham edik. "Real" kuchliroq edi va ko‘proq vaziyatlar yaratdi. Biz haqiqiy ruhiy barqarorlik, aql bovar qilmas iroda va jangovar ruhni namoyish etdik", — deya Michelning so‘zlarini keltiradi Mundo Deportivo nashri.

"Vaqtimizning katta qismini himoyalanish bilan o‘tkazdik va bu juda qiyin bo‘ldi. Odatiy o‘yin uslubimizni inobatga olsak, bu oson kechgani yo‘q — biz o‘zimizga xos tarzda harakat qila olmadik. Diqqat-e’tibor borasidagi jiddiy sinovdan o‘tib, uzoq vaqt davomida bardosh berdik", — deya qo‘shimcha qildi "Jirona" ustozi.

Ushbu durang natijadan so‘ng "Jirona" 38 ochko bilan turnir jadvalida 12-o‘rinni egallab turibdi. Yana uchta klub hisobida ham shuncha ochko mavjud va ular o‘z o‘yinlarini bir oz kechroq o‘tkazishadi.