«Челси» ярим ҳимоячиси Энцо Фернандес июнь ойида бошланадиган 2026 йилги Жаҳон чемпионати олдидан спорт формасини йўқотмаслик мақсадида, Мадридда яшаш истаги ҳақидаги баёнотларидан сўнг клуб билан ярашишга қарор қилди. Бу ҳақда AS нашри хабар бермоқда.

Манба берган маълумотларга кўра, аргентиналик футболчининг Жаҳон биринчилигидаги муваффақиятли иштироки ёзги трансфер ойнасида унинг нархи ошишига хизмат қилиши мумкин. Агар Лондон клуби жорий мавсум якунларига кўра Чемпионлар лигасига йўлланма ололмаса, Фернандесни сотишга мажбур бўлиши эҳтимоли юқори. Шу сабабли, ярим ҳимоячи мавсум охирида «яхши таассурот қолдиришни» истамоқда.

Энцо Фернандес 2023 йилнинг январидан бери «кўклар» сафида тўп суриб келмоқда. Жорий мавсумда ярим ҳимоячи барча турнирларда 46 та ўйинда иштирок этиб, 12 та гол ва 6 та голли узатмани ўз ҳисобига ёздириб қўйди. Футболчининг клуб билан амалдаги шартномаси 2032 йилнинг ёзига қадар мўлжалланган. Transfermarkt портали маълумотларига кўра, унинг бозор қиймати 90 миллион еврони ташкил этади.