«ПСЖ» ярим ҳимоячиси Витинья ўтган йили жамоанинг чемпионлик ва Чемпионлар лигасидаги ғалабасида муҳим рол ўйнаган эди. У ҳозир ҳам буни давом эттирмоқда — Витинья жамоа ўйинини назорат қилувчи асосий фигурага айланган.

Бунинг исботи сифатида унинг Чемпионлар лигасида ўрнатган янги рекордини келтириш мумкин — футболчи мусобақанинг жорий мавсумида 1319 та узатмани амалга оширди. «Ливерпуль»га қарши кечган баҳсда у Хави Эрнандеснинг «Барселона»даги сўнгги мавсумида (2014/2015) ўрнатган натижасини янгилашга муваффақ бўлди.

Ўшанда Хави бутун мусобақа давомида 1299 та узатмани амалга оширган эди. Эслатиб ўтамиз, ўша мавсумда «Барселона» ҳозирча ўз тарихидаги охирги бўлиб турган ЕЧЛ ғолиблигини қўлга киритган эди.