Якшанба куни «Челси» ўз мухлисларини ранжитди. Лиам Росиньор жамоаси ўз майдонида «Манчестер Сити»га 0:3 ҳисобида имкониятни бой берди. «Аристократлар» барча учта голни танаффусдан сўнг ўтказиб юборишди.

Премьер-лиганинг сўнгги учта ўйинида «Челси» фақат мағлубиятга учради ва бирорта ҳам гол ура олмади. Ушбу давр мобайнида «аристократлар» «Ньюкасл» (0:1), «Эвертон» (0:3) ва мана энди «Манчестер Сити»га (0:3) имкониятни бой беришди.

Squawka нашрининг хабар беришича, «Челси» охирги марта Премьер-лигада кетма-кет учта ўйинда гол ура олмасдан мағлуб бўлиши ўтган асрда — 1998 йилнинг март ойида содир бўлган эди.

Кейинги турда «Челси» яна ўз уйида Манчестернинг бошқа бир жамоаси — «Манчестер Юнайтед»га қарши баҳс олиб боради. Ўйин 18 апрель куни бўлиб ўтади.