УЕФА Чемпионлар лигаси 1/4 финалидан ўрин олган «Бавария» — «Реал» ҳамда «Арсенал» — «Спортинг» жамоалари ўртасидаги жавоб учрашувларига ҳакамларни тайинлади.
Германия ва Испания жамоалари ўртасидаги баҳсни словениялик Славко Винчич бошқариб борадиган бўлди. Унга қанотларда Томаж Кланчник ва Андраж Ковачич ёрдам беришади, тўртинчи ҳакам вазифасини эса Давид Шмайц бажаради. ВАР тизимига нидерландиялик Пол ван Букел ва Деннис Хиглер масъул этиб белгиланди.
Англия ва Португалия клублари ўртасидаги ўйинни Франсуа Летексье бошчилигидаги франциялик ҳакамлар бригадаси бошқаради. Унинг ёрдамчилари Сириль Мунье ва Мехди Рахмуни, захира ҳаками эса Стефани Фраппар бўлади. Видеоассистент (ВАР) сифатида германиялик Бастиан Данкерт, унинг ёрдамчиси сифатида эса белгиялик Брам ван Дриссхе тайинланди.













