Миланнинг «Интер» клуби сўнгги йилларда сермаҳсуллик бобида ажойиб натижалар қайд этмоқда — жамоа қаторасига еттинчи мавсумдирки, барча турнирларни инобатга олган ҳолда голлари сонини 100 та ва ундан оширишга муваффақ бўлди. Бироқ «Комо»га қарши кечган баҳс алоҳида аҳамият касб этди — ушбу ўйинда тўртта гол урган «Интер» А Серия тарихидаги энг сермаҳсул жамоага айланди.

Ҳозирги вақтга келиб, клубнинг Италия чемпионати юқори дивизионидаги иштироки давомида урган голлари сони 5465 тага етди. Айнан ўтган якшанба куни миланликлар ушбу кўрсаткич бўйича Туриннинг «Ювентус» клубидан ўзиб кетишди. «Ювентус» ушбу жадвалда 1975 йилдан бери, яъни роппа-роса эллик йил давомида пешқадамлик қилиб келаётган эди! Кучли учликни 5132 та гол билан «Милан» клуби якунлаб турибди.