Португалиялик футболчи Рикарду Куарежма ўзининг оёқ ташқи қисми (тривела) билан йўллайдиган ажойиб зарбалари орқали ном қозонган эди. Бироқ эндиликда у бу ишни ўзидан ҳам яхшироқ уддалаётган издошини кўрди. Бу — Каталониянинг «Барселона» клуби ёш суперюлдузи бўлмиш Ламин Ямал.
«Бу зарбани мен машҳур қилган эдим, аммо Ямал уни янги босқичга олиб чиқди. Унинг техникаси ақл бовар қилмас даражада, ҳеч ким буни у каби такрорлай олмайди. Мен илгари бунақасини кўрмаганман», — дея Куарежманинг сўзларини келтиради derbyderbyderby.it нашри.
Эслатиб ўтамиз, Куарежма ўз вақтида «Барселона» таркибида тўп сурган, гарчи бу узоқ давом этмаган бўлса-да. Ямал эса «Барселона»да 2023 йилнинг апрель ойида дебют қилган эди — тез орада ушбу воқеага роппа-роса уч йил тўлади.
