Ҳозирда Саудия Арабистонининг «Ал-Иттифоқ» жамоасида тўп тепаётган нидерландиялик хавбек Жоржиньо Вейналдум Европа футболига қайтиши мумкин. Бу ҳақда Sky Sports журналистлари хабар бермоқда.

Манбанинг берган маълумотига кўра, тажрибали ярим ҳимоячи фаолиятини Англия Премьер-лигасида давом эттириш истагини билдирган. Эслатиб ўтамиз, у илгари АПЛда «Ньюкасл» ва «Ливерпуль» клублари шарафини ҳимоя қилган.

Вейналдумнинг саудияликлар билан тузган амалдаги меҳнат шартномаси жорий мавсум якунида ўз ниҳоясига етади. Саудия Арабистони чемпионатининг ушбу мавсумида 35 ёшли футболчи 27 та ўйинда майдонга тушиб, ўз ҳисобига 14 та гол ва 6 та голли узатмани ёздириб қўйишга муваффақ бўлди.