Мадриднинг «Реал» клуби ярим ҳимоячиси Арда Гюлер жамоасининг Чемпионлар лигасини тарк этганига муносабат билдирди.
Испания гранди чорак финалда «Бавария»га умумий 4:6 ҳисобида имкониятни бой бериб, энг нуфузли еврокубокдаги иштирокини якунлади. Мюнхендаги жавоб учрашувида «қаймоқранглилар» 89-дақиқагача 3:2 ҳисобида олдинда бораётган бўлса-да, якунда 3:4 ҳисобида мағлуб бўлишди. 86-дақиқада Эдуардо Камавинга майдондан четлатилди ва бу қарор «Реал» вакилларининг кескин норозилигига сабаб бўлди.
«Бундай бўлиши керак эмас эди. Биз жуда афсусдамиз. Биз албатта қайтамиз. Hala Madrid», – деб ёзди ижтимоий тармоқларда учрашувда дубль қайд этган Гюлер.
Туркиялик футболчи ўйиннинг 34-сониясидаёқ Мануэль Нойернинг узатмадаги қўпол хатосидан фойдаланиб ҳисобни очган бўлса, 29-дақиқада жарима зарбасидан гол уришга муваффақ бўлди.
