Бразилиялик ҳужумчи Неймар Италиянинг «Милан» клуби билан алоқаси борлигини кўрсатди — маълум бўлишича, унда ушбу клубнинг либоси мавжуд.

Бу либос 2020/2021 йилги мавсум намунаси бўлиб, Неймар уни шахсан Златан Ибрагимовичдан олган. Бразилиялик футболчи ушбу либосни айнан қандай вазиятда қўлга киритгани ҳақида маълумот берилмаган. У Роналдо ва Роналдиньо каби аввалги бразилиялик юлдузлардан фарқли ўлароқ, Италия чемпионатида ҳеч қачон тўп сурмаган.

Агар Ибрагимович ўз вақтида «ПСЖ»да бироз узоқроқ қолганида, у ва Неймар бир клубда тўп суришлари мумкин эди. Аммо швед футболчиси у ердан 2016 йилда кетган, Неймар эса фақат кейинги йил — 2017 йилнинг ёзида Парижга келган.