Мадриднинг «Реал» клуби ярим ҳимоячи Эдуардо Камавинга сотилган тақдирда, унинг ўрнига кимни сотиб олмоқчи эканлиги маълум бўлди.

Журналист Экрем Конурнинг хабар беришича, «Реал»нинг режаси — ёзда Лондоннинг «Челси» клуби хавбеки Энцо Фернандесни сотиб олиш. Бу Испания грандининг асосий трансфер мақсадларидан бири ҳисобланади. Манбага кўра, ушбу келишув «қаймоқранглилар» раҳбарияти Камавингани трансферга қўйиш ҳақида қарор қабул қилганидан сўнг имконли бўлиб қолган.

Жорий мавсумда 25 ёшли Фернандес барча турнирларни ҳисобга олган ҳолда 46 та ўйинда майдонга тушди, 12 бор рақиблар дарвозасини ишғол этди ва ўз ҳисобига олтита голли узатмани ёздириб қўйди.

Transfermarkt портали маълумотларига кўра, аргентиналик футболчининг бозор қиймати 90 миллион еврони ташкил этади.