«Манчестер Сити» ҳужумчиси Эрлинг Холанд жамоа ярим ҳимоячиси Бернарду Силванинг кетиши борасида ўз фикрлари билан ўртоқлашди.
Аввалроқ португалиялик футболчи жорий мавсум якунланганидан сўнг «Манчестер Сити»ни тарк этишини маълум қилган эди.
«Бернарду, эҳтимол, мен бирга ўйнаган энг ақлли футболчидир. Унинг сўнгги тўққиз йил ичида «Манчестер Сити»даги фаолияти ҳақида гапирадиган бўлсак, бу шунчаки ақл бовар қилмас даражада бўлди. У олти марта Премьер-лига чемпиони бўлди, Чемпионлар лигасида ғолиб чиқди. Требл қайд этилган йилда унинг клуб учун нақадар муҳим бўлганига бир қаранг», — дея Холанднинг сўзларини келтиради Sky Sports News.
Норвегиялик ҳужумчи Силва сўнгги йилларда «Манчестер Сити» учун энг муҳим фигура бўлганини ва ушбу клубнинг шаклланишига бевосита ҳисса қўшганини алоҳида таъкидлаб ўтди.
Жорий мавсумда 31 ёшли Силва барча турнирларда 44 та ўйин ўтказиб, 3 та гол урди ва 5 та голли узатмани амалга оширди.
