«Порту» бош мураббийи Франческо Фариоли Европа Лигаси чорак финалида «Ноттингем Форест»дан учралган мағлубият ва жамоасининг турнирни тарк этгани ҳақида фикр билдирди.

Унинг сўзларига кўра, Португалия клуби ғалабага кўпроқ лойиқ эди, бироқ юзага келган вазиятлардан фойдалана олмади.

«Ҳар икки ўйин давомида ким ғалабага ҳақиқатдан ҳам лойиқ бўлганини ҳисоблаб чиқиш мумкин эди, аммо баъзида шунчаки «лойиқ бўлиш»нинг ўзи кифоя қилмайди. Гол уриш керак эди, биз эса буни уддалай олмадик, айниқса «Драгау»даги баҳсда», — дея афсус билан таъкидлади мураббий. Унинг сўзларини УЕФА матбуот хизмати келтирмоқда.

Эслатиб ўтамиз, Португалияда кечган илк учрашув 1:1 ҳисобида якунланган эди. Жавоб баҳсида эса «Порту» ўйиннинг катта қисмини бир киши кам бўлиб ўтказди ва 0:1 ҳисобида имкониятни бой берди.