Франциянинг «Пари Сен-Жермен» клуби футболчилари агар «Бавария» тўсиғидан ўтишса, кетма-кет иккинчи бор Чемпионлар лигасида зафар қучишларига ишонишмоқда. Бу ҳақда The Touchline нашри хабар бермоқда.

Манбанинг маълумотларига кўра, «ПСЖ» ичида бўлажак ярим финални «яширин финал» деб аташмоқда. Чунки клубдагилар ушбу жуфтлик ғолиби ҳал қилувчи баҳсда нариги сеткадан чиқадиган рақибни «супириб ташлаши»га аминлар.

Уларнинг фикрича, бу йил на «Арсенал», на «Атлетико» Чемпионлар лигасида ғолиб чиқишга қодир эмас, чунки улар даража жиҳатидан бир поғона пастроқда ҳисобланади.

Чемпионлар лигасининг дастлабки ярим финал учрашувлари доирасидаги «ПСЖ» – «Бавария» ва «Атлетико» – «Арсенал» ўйинлари мос равишда 28 ва 29 апрель кунлари бўлиб ўтади.

Эслатиб ўтамиз, «ПСЖ» Чемпионлар лигасининг амалдаги ғолиби ҳисобланади.