«Интер» ҳимоячиси Стефан де Врей Италия чемпионатининг 33-туридан ўрин олган «Кальяри» устидан қозонилган ғалабадан (3:0) сўнг ўз фикрларини билдирди.
«Ўйин жуда муҳим эди ва биз вазифани уддаладик, бироқ мавсум ҳали тугагани йўқ. Сўнгги вақтларда «Интер» иккинчи бўлимда юқорироқ тезликка ўтмоқда: Киву нимани яхшилаш кераклигини жуда яхши тушунади. Ўтган йили биз ажойиб мавсумни ўтказгандик, лекин ҳеч нарса юта олмадик. Биз кўпроқ ҳаракат қилиш кераклигини тушуниб етдик ва энди иккита совринни қўлга киритиш имкониятимиз бор, шунинг учун бор кучимизни ишга соламиз.
Ўйлайманки, ҳар бир футболчи «Интер»да ўйнаш нимани англатишини билади, ҳаммада ғалаба менталитети бор. Шунингдек, биз мағлубиятлардан сўнг қайта қаддимизни ростлай оламиз, бу менталитет ва характер масаласидир», — дея клуб матбуот хизмати де Врейнинг сўзларини келтирмоқда.
«Интер» 78 очко билан А Серия турнир жадвалида пешқадамлик қилмоқда. «Кальяри» эса 33 очко билан 16-поғонада бормоқда.
