Ҳужумчи Ромелу Лукаку «Наполи» билан машғулотларга қайтади.

Эслатиб ўтамиз, март ойида 32 ёшли ҳужумчи жисмоний ҳолатини яхшилашга эътибор қаратиш мақсадида Бельгия терма жамоаси ихтиёрини тарк этган эди. Футболчи Бельгияда шахсий мураббий билан шуғулланган – бу қарор клуб билан келишилмаган эди. «Наполи»нинг позицияси шундан иборат эдики, Лукаку 31 мартгача жамоа ихтиёрига қайтиши керак эди, акс ҳолда у таркибдан четлатиларди. Ромелу белгиланган куни машғулотга келмади ва клуб интизомий чоралар кўрилиши мумкинлигини билдирди.

Corriere dello Sport маълумотларига кўра, Лукаку Серия Анинг ушбу мавсумидаги сўнгги 5 та ўйини олдидан душанба куни «Наполи» машғулотларига қайтиши кутилмоқда. Бельгиялик футболчи ўз қарори ҳақида клубга агенти орқали хабар берган.

Таъкидланишича, Лукаку ва бош мураббий Антонио Конте 20 март куни бўлиб ўтган «Кальяри»га (1:0) қарши ўйиндан бери кўришишмаган. Неаполликлар 32 ёшли футболчини ўзбошимчалик билан жамоада бўлмагани учун жаримага тортишга қарор қилишди.

Бельгия терма жамоаси аъзоси мавсумолди тайёргарликда олган жароҳатидан сўнг, жорий мавсумда 7 та ўйинда майдонда бор-йўғи 64 дақиқа ҳаракат қилди.