Леонардо Бонуччи «Интер» ҳимоячиси Алессандро Бастони «Барселона» ўйинига мос тушиши мумкин деб ҳисоблайди. Аввалроқ «блауграна» ва Бастони шартнома бўйича келишувга эришгани ҳақида хабарлар тарқалган эди.

«Бастонининг футболга бўлган ёндашуви ва унинг хусусиятлари «Барселона»га жуда мос келади, чунки у майдонни аъло даражада кўра оладиган техник жиҳатдан кучли ҳимоячи.

Эҳтимол, «Барселона» юқори прессинг пайтида қолдирадиган бўш ҳудудлар билан боғлиқ муаммолар юзага келиши мумкин. Аммо ҳаммаси футболчининг индивидуал ва шахсий ўсишига боғлиқ: вазиятни тўғри ўқишни ва қийин аҳволга тушиб қолмасдан, воқеалар ривожини олдиндан кўра билишни ўрганиш керак.

У ҳали ёш футболчи, олдинда юқори савиядаги 6-7 йиллик фаолияти бор. Умид қиламанки, у терма жамоада ҳам «Интер»даги каби ўзига хос бўлган ишонч ва хотиржамликни қайтара олади», — деди Италия терма жамоаси собиқ ҳимоячиси.