Миланнинг «Интер» клуби Чемпионлар лигасидаги муваффақиятсизликка қарамай, ички аренада «олтин дубль» — чемпионат ва кубокда зафар қучиш сари ишонч билан илгариламоқда.
Сешанба оқшомида «Комо» устидан қозонилган ғалабадан сўнг «нерадзурри» Италия кубоги финалига йўлланмани қўлга киритди. Миланликлар ҳужумчиси Маркус Тюрам учрашувдан кейин ўз таассуротлари билан ўртоқлашди.
«Фантастик оқшом, ажойиб туйғулар. Ушбу мавсумда иккита совринни қўлга киритиш жуда ҳам гўзал иш бўларди», — дея футболчининг сўзларини келтиради fcinter1908.it нашри.
Эътиборли жиҳати, «Интер» жорий ҳафта охиридаёқ муддатидан олдин Италия чемпионига айланиши мумкин. Бунинг учун А Сериянинг навбатдаги 34-турида маълум натижалар қайд этилиши кифоя қилади.
Эслатиб ўтамиз, айни пайтда Кристиан Киву шогирдлари турнир жадвалида энг яқин таъқибчиларидан 12 очколик фарқ билан пешқадамлик қилмоқда.
