Мадриднинг «Реал» клуби Испания Ла Лигаси доирасида кечган навбатдаги учрашувда «Алавес» устидан 2:1 ҳисобида ғалаба қозонди. Учрашувнинг энг яхши футболчиси деб 30-дақиқада ҳисобни очган Килиан Мбаппе топилди.
Баҳс якунлангач, франциялик юлдуз ўзига голли узатмани амалга оширган туркиялик иқтидор соҳиби Арда Гюлерга алоҳида миннатдорчилик билдирди.
«Менинг кичик укам», — дея Мбаппе ижтимоий тармоқлардаги саҳифасида Гюлер билан бирга тушган суратини жойлаштирди.
Мадридликларнинг иккинчи голига 50-дақиқада Винисиус Жуниор муаллифлик қилди. Меҳмонлар ўзларининг ягона жавоб тўпини учрашувнинг иккинчи бўлимига қўшиб берилган вақтда киритишга муваффақ бўлишди.
Маълумот учун, Килиан Мбаппе айни дамда 24 та гол билан Ла Лига тўпурарлар пойгасида яккапешқадамлик қилмоқда. Арда Гюлер эса 9 та голли узатма билан чемпионат ассистентлари рўйхатида иккинчи ўринни эгаллаб турибди.
