Madridning «Real» klubi Ispaniya La Ligasi doirasida kechgan navbatdagi uchrashuvda «Alaves» ustidan 2:1 hisobida g‘alaba qozondi. Uchrashuvning eng yaxshi futbolchisi deb 30-daqiqada hisobni ochgan Kilian Mbappe topildi.
Bahs yakunlangach, fransiyalik yulduz o‘ziga golli uzatmani amalga oshirgan turkiyalik iqtidor sohibi Arda Gyulerga alohida minnatdorchilik bildirdi.
«Mening kichik ukam», — deya Mbappe ijtimoiy tarmoqlardagi sahifasida Gyuler bilan birga tushgan suratini joylashtirdi.
Madridliklarning ikkinchi goliga 50-daqiqada Vinisius Junior mualliflik qildi. Mehmonlar o‘zlarining yagona javob to‘pini uchrashuvning ikkinchi bo‘limiga qo‘shib berilgan vaqtda kiritishga muvaffaq bo‘lishdi.
Ma’lumot uchun, Kilian Mbappe ayni damda 24 ta gol bilan La Liga to‘purarlar poygasida yakkapeshqadamlik qilmoqda. Arda Gyuler esa 9 ta golli uzatma bilan chempionat assistentlari ro‘yxatida ikkinchi o‘rinni egallab turibdi.
