Мадриднинг «Реал» клуби Испания Ла Лигаси доирасида ўз майдонида «Алавес» устидан 2:1 ҳисобида ғалаба қозонди.

Учрашувда ҳисоб 30-дақиқада Килиан Мбаппе томонидан очилди. 50-дақиқада эса Винисиус Жуниор мадридликларнинг устунлигини иккитага оширди. Меҳмонлар баҳс якунида битта жавоб тўпини киритишга муваффақ бўлишди.

Ўйиннинг 58-дақиқасида жамоа етакчиларидан бири Джуд Беллингем майдонни тарк этди ва унинг ўрнига Браим Диас тушди. Жамоа бош мураббийи Альваро Арбелоа ушбу қарорига изоҳ бериб ўтди.

«Беллингемни алмаштирганимнинг сабаби — у Мюнхенда «Бавария»га қарши кечган ўтган баҳсда тўлиқ 90 дақиқа ҳаракат қилган эди. Милитао билан боғлиқ кўнгилсизликдан сўнг, Джуд борасида таваккал қилишни истамадим. У жума куни таркибга қайтади», — дея Арбелоанинг сўзларини келтиради The Touchline нашри.

Маълумот учун, ҳимоячи Эдер Милитао учрашувнинг биринчи бўлими охирида жароҳат олиб, майдонни тарк этишга мажбур бўлган.

«Реал» навбатдаги учрашувини 24 апрель куни сафарда «Бетис»га қарши ўтказади.